Ինչու են ճչում թենիսիստուհիները

Ինչու են ճչում թենիսիստուհիները: Գիտնականները պարզել են, որ թենիսի դաշտում թենիսիստուհիների բարձր ճչալը ոչ թե կամակորություն կամ հանդիսատեսի ուշադրությունը գրավելու միջոց է, այլ անհրաժեշտություն:

Բրունելի համալսարանի պրոֆեսոր Էլիսոն Մաքքոնելը նշում է, որ ճիչն օգնում է մեծացնել հարվածի ուժը` կարգավորելով հավասարակշռությունը: Թոքերում օդի մեծ քանակն օգնում է կայունություն ապահովել:

Առաջին թենիսիստուհին, որ խաղի ժամանակ սկսել է ճչալ, Մոնիկա Սելեշն է եղել: Սակայն 1992-ին այդ ձայները չափազանց բացասական արձագանք ստացան, ուստի թենիսիստուհուն Ուիմբլդոնի եզրափակչում կարգադրեցին ճչալ ցածր ձայնով:

Այդ ժամանակվանից թենիսիստուհիների ուժեղ ճիչերը գլխացավանք են խաղի դատավորների համար: Որոշ փորձագետներ անգամ զգուշացնում էին, որ նման ձայները կարող են ճնշող ազդեցություն ունենալ մրցակիցների վրա, որը չի համապատասխանում թենիսի կանոններին:

Սակայն Էլիսոն Մաքքոնելը նշում է, որ ուժեղ գոռալու կարողությունը խաղացողի մարզական պատրաստվածության եւս մեկ բոնուս է: Նրա խոսքով` լավ թենիս խաղալու համար անհրաժեշտ է ունենալ լավ զարգացած մկանային համակարգ եւ ուժեղ ողնաշար: Իսկ ինչ վերաբերում է շնչառական տեխնիկային, ապա անհրաժեշտ է շնչել եւ արտաշնչել բերանով: Նման ձեւով շնչելու յուրահատկությունը կայանում է նրանում, որ որոշ մարդկանց կտրուկ արտաշնչելու համար անհրաժեշտ է ձայներ արձակել:

Ճչացող ամենահայտնի թենիսիստուհիների թվում է 24-ամյա Մարիա Շարապովան, որը 100 դեցիբել ձայներ է արձակում: Այն ավելի բարձր է, քան  փոքր ինքնաթիռի շարժիչի արձակած ձայնը: Այս ցանկում են նաեւ Սերենա Ուիլյամսը, Միշել Լարշե դե Բրիտոն:

Նյութը վերցված է henaran.am  լրատվական կայքից