Չինաստանում արգելել են Լեդի Գագայի եւ Բեյոնսեի երգերը

Չինաստանի Մշակույթի նախարարությունն արգելել է ինտերնետում տեղադրել 100 հայտնի երգեր, որոնք կարող են "վնասել ազգային մշակույթը”: Այդ երգերի շարքում են Լեդի Գագայի, Բեյոնսեի, Backstreet Boys ու Take That խմբերի  հիթերը:

Որպես պաշտոնական պատճառ նշվել է համաշխարհային ցանցի չինական մասի  երաժշտական բովանդակությունը "կարգավորելու եւ օրինականացնելու” անհրաժեշտությունը: Արգելված երգերի ցանկում են հայտնվել Լեդի Գագայի նոր ալբոմի "Born this way”, "The Edge of Glory”, "Hair”, "Marry the Night”, "Bloody Mary” երգերը, որոնց արգելքի պատճառը չի նշվում:

Ենթադրվում է, որ չինական կառավարության դժգոհության պատճառ է դարձել այս երգերում առկա ազատության դրսեւորումները:  Մասնավորապես, "Hair” երգի հերոսուհին ցանկանում է ապրել եւ մեռնել այնքան ազատ, ինչքան իր մազերը, իսկ "Bloody Mary” երգն ավարտվում է "Ազատություն, սեր իմ” արտահայտությամբ:

Չինաստանի իշխանություններն առաջին անգամը չէ, որ նման արգելքներ են դնում: Օրինակ, 2006-ին բրիտանական Rolling Stones խմբին արգելեցին Պեկինում համերգի ժամանակ կատարել մի շարք երգեր:

Նյութը վերցված է henaran.am  լրատվական կայքից