Զգուշացում ծնողներին. Կարուսելներն անվտանգ չեն

"Կարուսելները իրավունք չունեն գործելու, քանի դեռ դրանք տեխնիկական զննում չեն անցել, թեև աշխատում են”,- այդ մասին Հենարան մամուլի ակումբում հայտարարեց ՀՀ ԱԻ նախարարության տեխնիկական անվտանգության ազգային կենտրոնի տնօրեն Աշոտ Պետրոսյանը:

Ի գիտություն ծնողների, նա հայտնեց, որ երեխաները կարող են նստել միայն այն կարուսելները, որոնց կողքին փակցված է անվտանգության մասին փաստող եզրակացություն` իր ստորագրությամբ: Հիշյալ կարուսելները, Աշոտ Պետրոսյանի հավաստմամբ, վտանգավոր չեն և, տնտեսվարող սյուբեկտների հետ հավասար, դրանց անվտանգության համար պատասխանատու է նաև տեխնիկական անվտանգության ազգային կենտրոնը:

Դեռ անցյալ տարի, կենտրոնի ղեկավարի խոսքով, Հայաստանում գրանցված կարուսելները 49-ն էին, իսկ այսօր ՀՀ տարածքում դրանց թիվը հասել է 108-ի (71 գտնվում են Երևանում, 6-ը` Վանաձորում, 6-ը` Կապանում և 19-ը` Գյումրիում): Այս տարի 108 կարուսելներից տեխզննում անցել են 42-ը, ընթացքի մեջ են` 23-ը, որոնց թերությունները նախատեսվում է վերացնել մինչև մայիսի 31-ը: Մյուսների տեխզննման ժամկետը դեռ չի լրացել:

"Ամենալավ վիճակում մանկական երկաթուղին է”,- տեղեկացնում է մասնագետը: